კონიუნქტივიტი, რომელიც საზოგადოებაში ხშირად „თვალის სიწითლისს“ სახელით არის ცნობილი, თვალის შემაერთებელი გარსის, ანუ კონიუნქტივას ანთებაა.
კონიუნქტივა წარმოადგენს თხელ ლორწოვან გარსს, რომელიც ფარავს ქუთუთოების შიდა ზედაპირს და თვალის კაკლის ხილულ ნაწილს რქოვანამდე. ამ სტატიაში დეტალურად განვიხილავთ კონიუნქტივიტის ერთ-ერთ ყველაზე გავრცელებულ ფორმას – ალერგიულ კონიუნქტივიტს.
რა იწვევს ალერგიულ კონიუნქტივიტს?
ალერგიული კონიუნქტივიტი ვითარდება, როდესაც თვალის ლორწოვანი გარსი კონტაქტში შედის ალერგენთან – ნივთიერებასთან, რომელიც იმუნური სისტემის გაძლიერებულ რეაქციას იწვევს. კონიუნქტივა განსაკუთრებით მგრძნობიარეა სხვადასხვა გამღიზიანებლის მიმართ. ალერგენების ჩამონათვალი საკმაოდ ფართოა და ზოგჯერ მისი ზუსტი იდენტიფიცირება რთულია.
ძირითადი ალერგენებია:
- მცენარეების მტვერი და სოკოს სპორები;
- საყოფაცხოვრებო ქიმიური საშუალებები;
- კოსმეტიკა და პარფიუმერია;
- გარკვეული მედიკამენტები;
- საკვები პროდუქტები.
ალერგიული კონიუნქტივიტის ტიპები და სიმპტომები
ალერგიული კონიუნქტივიტი ძირითადად ორი ფორმით გვხვდება: მწვავე და ქრონიკული.
მწვავე ალერგიული კონიუნქტივიტი, როგორც წესი, სეზონური ხასიათისაა. ის ალერგენთან კონტაქტიდან ძალიან მალე, შეტევის სახით იწყება და ხანმოკლე, ეპიზოდური მიმდინარეობა ახასიათებს.
ძირითადი სიმპტომებია:
- ქუთუთოების შეშუპება: თვალები შესიებული და დამძიმებულია.
- თვალების სიწითლე და ქავილი: ყველაზე დამახასიათებელი და შემაწუხებელი ნიშანი. ქავილი შეიძლება იყოს იმდენად ძლიერი, რომ პაციენტს თვალების მუდმივი სრესის სურვილი უჩნდება.
- ცრემლდენა: თვალებიდან ჭარბი სითხის დენა.
- გამონადენი: დამახასიათებელია მოთეთრო ფერის, ლორწოვანი, ზოგჯერ ქაფისებრი გამონადენი.
- ცხვირიდან გამონადენი: ხშირად ალერგიულ რინიტთან ერთად ვლინდება.
დიაგნოსტიკა და მკურნალობა
დიაგნოსტიკა: ალერგიული კონიუნქტივიტის დიაგნოზი, უმეტესად, კლინიკური ნიშნებისა და პაციენტის ჩივილების საფუძველზე ისმება. დამატებითი კვლევისთვის შეიძლება გამოყენებულ იქნას:
ალერგიული სინჯები: ალერგენის ზუსტად დასადგენად.
კონიუნქტივალური ნაცხის ანალიზი: ეოზინოფილების (ალერგიის მარკერი უჯრედების) გამოსავლენად.
მკურნალობა: მკურნალობის უმთავრესი პრინციპი ალერგენთან კონტაქტის აღმოფხვრაა. თუ ეს შეუძლებელია, ინიშნება მედიკამენტური თერაპია, რომელიც დამოკიდებულია სიმპტომების სიმძიმეზე.
ადგილობრივი მკურნალობა მოიცავს:
- ცივი საფენები: ამცირებს შეშუპებასა და დისკომფორტს.
- ხელოვნური ცრემლი: გამორეცხავს ალერგენებს და ატენიანებს თვალის ზედაპირს.
- ანტიჰისტამინური და მასტ-უჯრედების სტაბილიზატორი წვეთები: ბლოკავს ალერგიულ რეაქციას და ამცირებს ქავილსა და სიწითლეს.
- სტეროიდული წვეთები: ინიშნება მძიმე შემთხვევებში, ექიმის მკაცრი კონტროლის ქვეშ.
- ადგილობრივი ვაზოკონსტრიქტორები: დროებით ავიწროებს სისხლძარღვებს და ამცირებს სიწითლეს.
მძიმე შემთხვევებში, შესაძლოა, დაინიშნოს დასალევი სისტემური ანტიჰისტამინური საშუალებებიც. ნებისმიერი მკურნალობა უნდა წარიმართოს ექიმ-ოფთალმოლოგის მეთვალყურეობით.
სტატიის ავტორი: ხატია ხუციშვილი
ოფთალმოლოგი
მსგავსი სტატიები
Leave a Reply
Leave a Reply
